Revue

Revue

PNHS se revue sal enige kultuurliefhebber se tone laat omkrul van lekkerkry. Dit is geen geheim dat die vertonings iets vir almal inhou en dat die revue elke jaar oor ‘n tema beskik wat die gehoor se hartsnare ,op ‘n voelgoed wyse, roer nie.


Die oudisies word al vroeg in Februarie afgelê en daarna begin die leerders volstoom oefen. Die leerders oefen twee maal per week, Dinsdae en Donderdae, van 19:00 tot 21:00.

Saam met die danspassies, wat deur ‘n gekwalifiseerde dansinstrukteur uitgewerk is om by die tema en storielyn te pas, word daar ook ‘n klankopname gemaak waar daar ongeveer vyftien leerders gekies word vir die opname.

Dit is ook natuurlik gepas dat die leerders in die regte kostuums en gegrimeer is en daarom lyk die groep elke jaar spoggerig op die verhoog. Buiten vir die oefen, hou die revue hope pret en ontspanning vir die leerders in en word nuwe vriendskapsbande gesmee.

Kompetisies en optredes skop vroeg in die derde kwartaal af en die groep neem elke jaar deel aan Kaleidoscope (Staatsteater), Noorderkruin Kunstefees, Afrikaanse Kunsvereniging Pretoria Kunswedstryd, PNNK Talentaand, Tswane Jeugkunstefees (Staatsteater), die Wonderliggiefees en enige ander geleentheid wat oor hul pad kom.

In 2018 was die groep se tema “Krygers van hoop” en het hierdie hartroerende, aktuele tema twee A++ toekennings, ‘n 80% by Kaleidoscope en verskeie kategorie- en medaljewenners, verower. In die vierde kwartaal sluit die groep hul seisoen af met ‘n aand se genot by Rockwood Theatre wat met die jare ‘n revue-tradisie geword het.

Maak los jou litte, laat spat met die blinkers en sing uit volle bors, want by PNHS se revue is dit ‘n fees om op die verhoog te wees.


Nuutste Nuus


Covid-19 het dit beslis uitdagend gemaak om ‘n revue-produksie op die planke te bring, maar PNHS het nie geskroom om in 2021 die uitdaging aan te pak nie. Ten spyte van al die uitdagings, kan daar met trots gesê word dat PNHS in 2021 uitgeblink het in revue.

Daar was nie baie geleenthede om aan deel te neem, maar PNHS se revue-groep het beslis die vrugte van hul harde werk by die kompetisies, wat wel plaasgevind het, gepluk.

Die groep sluit 2021 se revue-seisoen af met die volgende toekennings:

  • Afdelingswenner by 8 Beats revue-kompetisie.
  • Wenners van Symposium dance talent.
  • A++ Raca Kunswedstryd.

Die revue-seisoen van 2022 het reeds afgeskop en die revue-groep van vanjaar bestaan uit ongeveer 85 leerders. Die groep is alreeds hard aan die werk en sien uit na al die kompetisies wat voorlê.



Gallery



Terug