Redenaars

Redenaars bevorder leerders se vermoëns om voor ‘n gehoor met selfvertroue te kan praat, standpunt te kan inneem en ‘n gehoor daarvan te oortuig. PNHS kweek sterk sprekers met ‘n opinie! Onthou, jou woorde het meer krag as ‘n atoombom – kies daarom joune wys en maak jou stem dik deur deel te word van PNHS se redenaarspan.

PNHS bied verskeie redenaars geleenthede vir voorbereid en onvoorbereide sprekers aan. Voorbereide redenaars verg van leerders om ‘n toespraak te hê wat tussen 5 en 7 minute lank is. Hierdie toespraak moet aan spesifieke vereistes voldoen om sodoende gepas te wees.

Onvoorbereide redenaars is waar leerders tussen een en twee uur voor die praattyd ‘n onderwerp en bronne ontvang en in die gegewe tyd ‘n praatjie moet skryf. Hierdie kategorie verg van leerders om bewus te wees van aktuele sake, om idiomatiese uitdrukkings te verslind en om goed op hul voete te kan dink. Die organiseerder van die redenaars bied die nodige bystand om te verseker dat praatjies voldoende is en dat die leerders oor die nodige kennis en vaardighede beskik voordat hulle gaan praat.

As jy sou kies om deel te word van die redenaarsspan kan jy jouself vir die volgende regmaak: Ons skop af met ‘n interne “Raakpraat Redenaars” kompetisie wat vroeg in Februarie plaasvind. Op hierdie wyse word daar vasgestel watter leerders deurdring na die eksterne kompetisies.

Die eerste groot, nasionale kompetisie, waaraan ons deelneem is die ATKV Redenaars in Aprilmaand. Hier is verskeie rondtes wat dan uiteindelik by die nasionale rondte eindig. In kwartaal drie is daar verskeie kompetisies soos Radikale Redenaars, Kans!Vatter en ook OppiTongAf-Redenaars waarvoor PNHS se redenaarsleerders ingeskryf word – ook op nasionale vlak.

Daar gaan baie voorbereiding in elke leerders se praatjie en aanbiedingsvaardighede in. Elke leerder moet minstens een maal per week vir ‘n uur oefen om sodoende te verseker dat hul praatjie die regte lengte is, die bronne reg aangehaal is en dat elke spreker die nodige sjarme en emosie aan hul praatjie koppel.

Onvoorbereide leerders woon ook die oefening by om hul kognitiewe denkvlakke te bevorder en aan te wakker. Hier leer hul hoe om idiomatiese uitdrukkings te gebruik en standpunt in te neem.

Afrigters / Personeel betrokke:

Juffrou M. Basson (Organiseerder)
Juffrou K. Avenant

Vir die nuutste uitslae en nog meer foto's volg ons gerus op Facebook:

Facebook blad

Nuutste Nuus

Redenaars 2024

Vanjaar se redenaars-seisoen het afgeskop op die 14 Februarie met ons Interne Redenaars. Hierdie datum was uiters gepas omdat die simbool van liefde die wyse waarop elkeen van die sprekers die beoordelaars se harte laat warm klop het, simboliseer. Daarna het hierdie fenomenale sprekers hul toesprake gaan lewer by die ATKV-redenaars asook Radikaal en Kansvatter. Menigte leerders van Hoërskool Pretoria-Noord het deurgedring na Kansvatter se semi-finaal en ook finale rondte waar Helé Lottering 'n tweede plek op nasionale vlak verwerf het. By Interne Redenaars het Mia Rynners en André Haarhoff gewys dat hulle die vermoë het om ys aan 'n eskimo te verkoop, aangesien die twee bykans 100% vir die lewering van hul toesprake verower het. Elke spreker het vanjaar die gehoor hope gegee om oor na te dink. Mag hierdie sprekers in 2025 aanhou om ons gedagtes te prikkel.

PNHS se redenaars het beslis naam gemaak in 2023.

Daar is deelgeneem aan die interne redenaarskompetisie asook Radikaal-, ATKV- en die Kansvatter redenaars. Die leerders het puik prestasies behaal. By die interne redenaars was die junior wenner Cheyenne Pieterse en die senior wenner André Haarhoff. By die Kansvatter kompetisie het PNHS oor stof in die res se oë geskop. Mia Rynners het deurgedring na die finale rondte vir voorbereide- en onvoorbereide toesprake. Cathleen Roets het ook derde plek behaal in die onvoorbereide afdeling en Marique Bam vierde plek.

Daar heers reeds groot opwinding rakende 2024 se onderwerpe wat reeds beskikbaar is:
Graad 8 en 9: kantlyn, meulsteen of boekmerk
Graad 10-12: metafoor, visie of paradoks