Mnr En Mej Pnhs

Mnr en Mej PNHS

Mnr. en Mej. Hoërskool Pretoria-Noord – Die sosiale glansgeleentheid van die jaar.

Mnr. en Mej. Hoërskool Pretoria-Noord is verseker een van die hoogtepunte op elke jaar se sosiale kalender. Hierdie spoggeleentheid is beslis nie net ŉ skoonheidskompetisie nie, maar bied ook aan ons Gr. 10 – Gr. 12 leerlinge ŉ platform vir selfontdekking en persoonlike groei ten opsigte van ŉ gesonde en positiewe selfbeeld. Gedurende die oefensessies word finaliste deur bekwame afrigters touwys gemaak rakende loopplank-etiket, hoe om uitrustings te modelleer en hoe om jouself te handhaaf wanneer die kollig op jou val. Daar word egter nie gepoog om ŉ plastiese en generiese voorkoms van skoonheid uit te beeld nie. In teen deel word finaliste gemotiveer om die gehoor en die beoordeelaars deur hulle eie unieke sjarme en sprankelende persoonlikhede te betower. Die uiteinde is dat elke finalis sy/haar eie definisie moet verleen aan die konsep van skoonheid en besef dat filters en ander toeps wat gebruik word om foto’s te dokter net valse illusies skep.

Vir die nuutste uitslae en nog meer foto's volg ons gerus op Facebook:

Facebook blad

Nuutste Nuus

Mnr. en Mej. PNHS 2024 – Reën – Stormagtige Geleentheid!

Die organiseerders het dit goed gedink om ŉ tema te kies waaraan verskeie simboliek toegeken kan word. Reën bring hoop, vernuwing, ŉ sin van skoonheid en ŉ mate van geluk. Tog ook is reën verwant aan storms en die krag van water. Die hele produksie, insluitend liedjies, kostuums en choreografie, het die verskeie simboliese aspekte van reën uitgebeeld. Die storm het behoorlik losgebars toe die finaliste hulle eerste verskyning op die verhoog gemaak het, met danspassies wat self deur PNHS-leerders gechoreografeer is. Vir die informele drag het elke finalis sy/haar eie uitrusting gekies en die beoordelaars en gehoor betower met hulle eie unieke produksies op uiteenlopende tema-verwante liedjies. Finaliste moes ook hulle self bekendgestel het aan die beoordelaars en gehoor, sodoende elke deelnemer die geleentheid te bied om sy/haar uniekheid en menswees ten toon te stel. Na afloop van die pouse het die finaliste in pare oor die loopplank heen gepronk in pragtige aandrokke en pakke wat deur Smart Guy voorsien is. Beauty on Wheels het toegesien dat die dogters se grimering elkeen se skoonheid ten beste op toon stel en daar was beslis nie ŉ haar uit plek nie. Deelnemers en wenners van die PNNK 2023 het ook die gehoor in vervoering gebring met verskeie sang, dans en instrumentale items. Dit was verseker ŉ stormagtige aand en die gehoor sowel as die finaliste en beoordelaars het dit terdeë geniet.

2024 Wenners:

PNHS-Gunsteling: Marlené Britz

Mnr. Fotogenies: Dehan Joubert

Mej. Fotogenies: Michelle Brown

Mnr. Persoonlikheid: Ishmael Manamela

Mej. Persoonlikheid: Marlia Botha

Mnr. Hoërskool Pretoria-Noord: Schalk Fourie

1ste Prins: Ishmael Manamela

2de Prins: Dehan Joubert

Mej. Hoërskool Pretoria-Noord: Marlené Britz

1ste Prinses: Elmey Wagner

2de Prinses: Cheyenne Pieterse

Afrigters en Personeel betrokke:

Me. A. van Niekerk, Me. L. Venter-Kruger, Me. A. Pieterse, Nadine Barkhuizen en Bianca Swanepoel.

Na die seisoen:

Die organiseerders is reeds druk besig met die reëlings vir Mnr. en Mej. Pretoria-Noord 2025.

Elkeen van ons verval soms in ŉ toestand van vrees, angs, bekommernis en moedeloosheid – die berge is hoog en die dale is diep, maar deur ŉ intrinsieke dryfkrag en veggees styg ons bo dié omstandighede uit om ons drome en ideale in ŉ realiteit te kan omskep.